FESTIVAL DE NADAL 2025 ... CON MOITO CONTO

 

FESTIVAL DE NADAL CON MOITO CONTO de ceip curtis

O pasado 19 de decembro, o Salón de Servizos Múltiples do CEIP de Curtis encheuse de ilusión, música, teatro e emoción coa celebración do noso tradicional Festival de Nadal.

Familias, alumnado e profesorado compartimos unha xornada moi especial na que os nenos e nenas demostraron o seu talento e o seu entusiasmo a través das diferentes actuacións preparadas para estas datas tan sinaladas.

O festival comezou coa actuación do alumnado de Educación Infantil, que interpretou a panxoliña "Xa me tardan". A continuación, o alumnado de 6º de Primaria presentou a informativa "Con moito conto", relacionada co proxecto que nos acompañou durante o curso.

Os nenos e nenas de 1º de Primaria alegraron o escenario coa panxoliña "Chegou o Nadal", mentres que o alumnado de 2º de Primaria interpretou "Unha pouca roupiña". Pola súa banda, os alumnos e alumnas de 5º de Primaria sorprenderon ao público coa representación teatral "O apagón máxico do Nadal".

A música continuou da man de 3º de Primaria, que ofreceu o musical "Contos revoltos", e o peche do festival correu a cargo do alumnado de 4º de Primaria, cun emotivo conto sonoro titulado "Un Nadal con moito conto".

Foi unha mañá chea de ledicia, convivencia e espírito nadalengo na que puidemos comprobar, unha vez máis, o esforzo e a dedicación do alumnado e do profesorado na preparación de cada actuación.

Desde o CEIP de Curtis queremos agradecer a colaboración das familias e felicitar a todos os participantes por facer posible un festival tan especial. Desexámosvos un moi feliz Nadal e un próspero Aninovo!

RESULTADOS POR CASAS DO GRAN TORNEO DE ODESED

 

TORNEO DO ESPELLO DE ODESED

 

A última sesión do club de lectura "A maxia da lectura" estivo marcada por unha actividade moi especial: o Torneo do Espello de Oesed, unha proposta inspirada no universo de Harry Potter que puxo a proba os coñecementos e a capacidade de traballo en equipo do alumnado.

Os participantes organizáronse por casas, seguindo a tradición de Hogwarts, e tiveron que superar diferentes retos relacionados coa lectura de Harry Potter e a pedra filosofal. Preguntas sobre os personaxes, os lugares máxicos, os acontecementos da historia e as curiosidades do libro permitiron comprobar o atentos que estaban durante a lectura.

Ao longo do torneo, os equipos sumaron puntos grazas á súa participación, á cooperación entre os seus membros e á súa habilidade para resolver os desafíos propostos. O ambiente estivo cheo de emoción, compañeirismo e, por suposto, moita maxia.

Parabéns a todas as casas participantes polo seu entusiasmo e pola súa gran participación nesta xornada máxica!

LECTURAS CON LANTERNA: GRAN TORNEO DO ESPELLO DE ODESED

Chega un dos momentos máis esperados do curso:

O GRAN TORNEO DO ESPELLO DE ODESED!

Un desafío diferente, cheo de probas, inxenio… e algún que outro xiro inesperado. O alumnado participará en equipos, resolverá retos con  emoción, risas, compañeirismo… e moitas ganas de superarse.

Prepárate e non faltes á cita o vindeiro 15 de decembro ás 12:00 h, porque neste torneo, cada xogada conta.

 

NOVEMBRO, MES DA CIENCIA NO CEIP DE CURTIS

 

Durante o mes de novembro, a ciencia converteuse na gran protagonista das actividades do noso centro. Ao longo destas semanas, o alumnado participou en diferentes propostas que lle permitiron investigar, experimentar e aprender dun xeito práctico e divertido.

A robótica foi unha das actividades máis destacadas, permitindo aos nenos e nenas desenvolver o pensamento lóxico, a creatividade e a resolución de problemas mediante a programación e o manexo de diferentes dispositivos. A través dos retos propostos, o alumnado comprobou como a tecnoloxía pode axudarnos a comprender mellor o mundo que nos rodea.

A ciencia tamén chegou ás aulas a través da cociña. As receitas elaboradas polos distintos grupos convertéronse en auténticos experimentos nos que puidemos observar cambios de estado, mesturas, reaccións e transformacións dos alimentos, demostrando que a ciencia está presente nas actividades cotiás.

Outra das propostas máis vistosas foi a elaboración de maquetas do Sistema Solar. O alumnado investigou sobre os planetas, as súas características e a súa posición no universo, creando traballos cheos de detalle e imaxinación que permitiron achegarnos ao fascinante mundo da astronomía.

Con todas estas actividades, o CEIP de Curtis celebrou o Mes da Ciencia promovendo a curiosidade, a observación e o gusto por aprender. Porque a ciencia non só está nos laboratorios: está tamén nos robots, na cociña, nas estrelas e en cada pregunta que nos facemos sobre o mundo que nos rodea.

SAÍDA DE INFANTIL Á BIBLIOTECA PÚBLICA MIGUEL GONZÁLEZ GARCÉS DE A CORUÑA

 

O pasado mércores 26 de novembro todo o ciclo de infantil fixemos unha saída á biblioteca pública Miguel González Garcés de A Coruña. Comezamos a visita no salón de actos, onde Elena e Eugenio nos explicaron como funciona o sistema de préstamo da biblioteca, que pasos temos que seguir para crear o noso carné ou mesmo nos ensinaron diferentes tipos de libros que teñen na biblioteca e que podemos levar á casa.

PLAN DE LECTURA, ESCRITURA E ACCESO Á INFORMACIÓN

Durante o presente curso 2025/26, o CEIP de Curtis está inmerso no proceso de elaboración e actualización do seu PLEA (Plan de Lectura, Escritura e Acceso á Información), un documento estratéxico que orientará todas as actuacións relacionadas coa competencia lectora, a escritura e o acceso á información en todas as etapas e áreas educativas do centro.

O obxectivo deste plan é promover unha cultura lectora sólida, mellorar as competencias comunicativas do alumnado e potenciar o uso da biblioteca escolar como un espazo de aprendizaxe, investigación e encontro.

Para que este documento responda ás necesidades reais da nosa comunidade educativa, iniciamos unha primeira fase de diagnóstico e avaliación. Con este fin, elaboráronse diferentes cuestionarios dirixidos ao alumnado, ás familias e ao profesorado co propósito de coñecer os hábitos lectores, os intereses, as preferencias e as necesidades de cada un dos sectores implicados.

A participación de toda a comunidade educativa resulta fundamental neste proceso, xa que a información recollida permitirá obter unha visión global da situación actual do centro e servirá como punto de partida para establecer obxectivos, liñas de actuación e propostas de mellora axeitadas á nosa realidade.

Os datos obtidos contribuirán a deseñar un PLEA máis eficaz, inclusivo e adaptado aos retos educativos actuais, reforzando as actuacións vinculadas ao fomento da lectura, á produción escrita, á alfabetización informacional e ao desenvolvemento da competencia lectora en todas as áreas do currículo.

Agradecemos de antemán a colaboración das familias, do alumnado e do profesorado neste proceso de reflexión e mellora continua, convencidos de que a participación de todos e todas é esencial para construír un proxecto compartido que favoreza o éxito educativo e o gusto pola lectura.

Seguiremos informando dos avances deste proceso ao longo do curso.

 

PRIMEIRA XUNTANZA DO CLUB DE LECTURA

O club de lectura "A maxia da lectura" celebrou a súa primeira xuntanza arredor dunha das obras máis coñecidas da literatura xuvenil: Harry Potter e a pedra filosofal.

Durante a sesión, o alumnado achegouse á figura da autora J. K. Rowling, coñecendo algúns aspectos da súa vida e da creación dunha saga que conquistou millóns de lectores en todo o mundo. Tamén descubrimos curiosidades sobre o libro, os seus personaxes e o universo máxico de Hogwarts, que espertaron o interese e a curiosidade de todos os participantes.

Ademais, completamos a ficha de lectura da obra, recollendo información básica que nos axudará a seguir profundando na historia ao longo das próximas sesións.

Un dos momentos máis enriquecedores foi a posta en común das primeiras impresións sobre a lectura. O alumnado compartiu as súas expectativas, comentou os capítulos iniciais e expresou as emocións e sensacións que lles transmitiron os primeiros pasos de Harry no mundo da maxia.

Esta primeira reunión serviunos para abrir a porta a unha aventura literaria chea de misterios, amizade e maxia. Estamos desexando continuar a lectura e seguir descubrindo os segredos que agocha Hogwarts.

A aventura non fixo máis que comezar!

COMEZA O CLUB DE LECTURA... "A MAXIA DA LECTURA"

 

Esta semana, o alumnado de 5º e 6º de Primaria recibiu unha moi especial: as súas invitacións para participar na primeira sesión do club de lectura. 

Inspirándonos nas famosas cartas de Hogwarts, preparamos unhas invitacións cheas de maxia e misterio que sorprenderon aos nenos e nenas nada máis recibilas.

NOVEMBRO, MES DA CIENCIA EN GALEGO

 

ROBÓTICA PARA EDUCACIÓN INFANTIL

A través do uso de robots adaptados á súa idade, o alumnado, mediante diferentes retos, tiveron que programar os robots para que se desprazasen por un taboleiro musical, identificando instrumentos traballados na aula.

Esta proposta permitiu combinar a expresión musical co desenvolvemento do pensamento lóxico e computacional, favorecendo ao mesmo tempo a colaboración, a resolución de problemas e a creatividade. Os pequenos e pequenas amosaron un grande entusiasmo durante toda a actividade, participando activamente e superando cada reto con ilusión.

A robótica educativa convértese así nunha ferramenta moi valiosa para enriquecer as experiencias de aprendizaxe, demostrando que a música e a tecnoloxía poden formar un excelente equipo.

EXPOSICIÓN DE CABAZAS "CON MOITO CONTO..."

 

Como non podía ser doutro xeito, a tradicional exposición de cabazas deste ano estivo inspirada no tema do noso proxecto anual, "Con moito conto".

Cabazas decoradas con personaxes, historias e escenas saídas dos contos máis coñecidos, convertendo a exposición nun auténtico percorrido polo mundo da literatura e da imaxinación. Cada cabaza reflectiu o esforzo, a creatividade e a ilusión das familias, que unha vez máis responderon de maneira extraordinaria a esta proposta.

Desde o CEIP de Curtis queremos expresar o noso máis sincero agradecemento a todas as familias pola súa implicación e colaboración. Grazas ao voso traballo e entusiasmo foi posible crear unha exposición chea de cor, orixinalidade e maxia, que fixo as delicias de todo o alumnado e do profesorado.

Moitas grazas por axudarnos a encher o Samaín de creatividade e, este ano máis ca nunca, de moito conto.

DÍA DAS BIBLIOTECAS: PRESENTAMOS O PROXECTO "CON MOITO CONTO ..."

 

O pasado 24 de outubro conmemoramos no CEIP de Curtis o Día das Bibliotecas, unha data moi especial para a nosa comunidade educativa e que, como xa vén sendo habitual, aproveitamos para presentar o proxecto que nos acompañará ao longo deste curso 2025/26.

Baixo o título “Con moito conto”, iniciamos unha nova aventura chea de historias, personaxes, imaxinación e aprendizaxes compartidas. A través deste proxecto, a lectura e os contos converteranse no fío condutor para descubrir, crear, investigar e gozar da maxia dos libros.

Ao longo dos próximos meses, cada grupo realizará unha viaxe diferente, adaptada á súa idade e aos seus intereses. Os máis pequenos de Educación Infantil iniciaranse no fascinante mundo dos contos clásicos en 3 anos, mentres que en 4 anos darán vida a un libro viaxeiro que medrará grazas á colaboración das familias. Pola súa banda, o alumnado de 5 anos descubrirá as posibilidades narrativas e artísticas do cómic.

No Primeiro Ciclo de Primaria, os nenos e nenas de 1º achegaranse ás inesquecibles historias de Hans Christian Andersen, acompañando personaxes que levan xeracións facendo soñar a lectores de todo o mundo. En 2º curso, a literatura e a música daranse a man para explorar contos nos que as palabras e os sons se mesturan creando experiencias únicas.

O Segundo Ciclo mergullarase en historias cheas de aventura e fantasía. En 3º de Primaria, os animais converteranse nos protagonistas de numerosos relatos, mentres que en 4º curso as bruxas, os misterios e os elementos máxicos abrirán a porta a novas investigacións e descubrimentos.

Finalmente, no Terceiro Ciclo, o alumnado de 5º afondará na riqueza das lendas galegas, descubrindo os seres, lugares e historias que forman parte do noso patrimonio cultural. E en 6º de Primaria, a etapa pecharase cun percorrido por algunhas das obras máis emblemáticas da literatura universal, entre elas O Principiño, unha historia que continúa emocionando xeración tras xeración.

Con esta presentación demos o pistoletazo de saída a un curso que promete estar cheo de lectura, investigación, creación e aprendizaxes compartidas. Porque detrás de cada conto escóndese unha oportunidade para descubrir o mundo, e este ano no CEIP de Curtis temos... moito conto que contar.

A NOSA BIBLIOTECA SALTA A KOHA

Durante o curso 2025/26, a biblioteca do CEIP de Curtis iniciou o proceso de migración ao sistema de xestión bibliotecaria Koha, unha ferramenta moderna e eficiente que permitirá mellorar a organización e o funcionamento dos nosos fondos.

Este cambio supón un importante avance na xestión da biblioteca escolar, facilitando a catalogación dos materiais, o control dos préstamos e a consulta do catálogo. Ademais, Koha forma parte da aposta da Rede de Bibliotecas Escolares de Galicia por un sistema común que favoreza a colaboración e o intercambio de recursos entre centros educativos.

Ao longo deste proceso realizouse un intenso traballo de revisión, actualización e adaptación dos rexistros bibliográficos para garantir unha transición ordenada e eficaz.

Con esta mellora, a nosa biblioteca continúa avanzando para ofrecer un servizo de maior calidade á comunidade educativa, converténdose nun espazo cada vez máis accesible, dinámico e adaptado ás necesidades do alumnado e do profesorado.

"CON MOITO CONTO ..." CONTOS DE BRUXAS, LOBOS E MOITO MISTERIO

 

Coa chegada do Samaín, preparamos unha escolma de libros protagonizados por bruxas, lobos, monstros, criaturas fantásticas e personaxes que nos farán tremer... e tamén rir e imaxinar.

Ao longo destas semanas, os nenos e nenas tiveron a oportunidade de descubrir contos e relatos cheos de misterio, aventuras e emocións, adaptados ás diferentes idades e intereses. Bruxas simpáticas e trasnadas, lobos que rompen cos estereotipos dos contos tradicionais e historias de medo pensadas para gozar da lectura foron algúns dos protagonistas desta selección especial.

Esta iniciativa forma parte do noso proxecto anual "Con moito conto", que nos está permitindo percorrer diferentes mundos literarios e achegarnos a unha gran variedade de historias ao longo do curso.

Feliz Samaín e felices lecturas!

COMEZA O PDI "CON MOITO CONTO"

 

O Día das Bibliotecas está cada vez máis preto e con el dará comezo o noso novo Proxecto Documental Integrado: "Con moito conto".

Este curso, cada clase terá unha importante misión: escoller os contos que a acompañarán ao longo do ano. A partir deles leremos, investigaremos, escribiremos, crearemos e descubriremos novos personaxes, lugares e historias.

Por iso, convidamos a todos os grupos a achegarse á biblioteca o vindeiro 24 de outubro, Día das Bibliotecas, para participar na inauguración do proxecto e presentar os contos escollidos para esta gran aventura.

 Que historias nos sorprenderán este ano?

Que personaxes coñeceremos?

Que contos seremos capaces de crear?

Estamos desexando descubrilo con vós. Agardámosvos na biblioteca para dar comezo a un curso... con moito conto!

LECTURAS CON LANTERNA ... "A MAXIA DA LECTURA"

Se estás en 5º ou 6º de primaria, participa no noso club de lectura "Lecturas con Lanterna" chega cheo de lecturas máxicas.

Reunirémonos un luns ao mes pola tarde e temos historias incribles por descubrir ...

… e sentir que cada páxina cobra vida.

INCRÍBETE ANTES DO 23 DE SETEMBRO!!!

 

CON MOITO CONTO ... O NOSO PROXECTO PARA O CURSO 2025/26

Érase unha vez ... un curso cheo de contos

Durante o curso 2025/26 a nosa biblioteca aposta polo desenvolver o Proxecto Integrado a Nivel de Centro "Con moito conto ..." .

Historias que se converterán no fío invisible que coserá aprendizaxes, emocións e experiencias nas nosas aulas a través da biblioteca. A través dos contos viaxaremos a lugares fantásticos, coñeceremos personaxes inesquecibles e descubriremos que, dentro de cada conto agroma a semente do amor pola lectura e pola escritura. 

Con este proxecto iniciamos un camiño cheo de palabras, soños e aprendizaxes. Un curso coas mochilas cheas de libros e de ilusión. 

E así comeza o noso conto para o curso 2025/26 .. acompañádesnos nesta historia?

 

PROXECTO NÓS SOMOS HISTORIA: A IDADE MODERNA

Os alumnos e alumnas de 4º de Primaria mergulláronse na Idade Moderna. A partir de diferentes fichas de traballo, foron investigando e afondando nos acontecementos históricos máis relevantes deste período, descubrindo tamén os importantes cambios sociais e económicos que transformaron a sociedade da época.

Durante a investigación, tiveron a oportunidade de coñecer mellor a figuras clave da nosa historia, entre elas María Pita, cuxo exemplo de valentía resultou especialmente inspirador para o alumnado.

O proxecto non se limitou só á parte teórica. Os nenos e nenas traballaron tamén na preparación do tapiz colectivo, no que representaron os feitos históricos máis destacados a través de cadros pintados sobre liño.

Para completar a experiencia, elaboraron unha presentación en galego e en inglés, na que explicaron o seu proceso de investigación e compartiron curiosidades sobre a Idade Moderna. Unha experiencia moi enriquecedora na que combinaron investigación, creatividade e comunicación, converténdose por uns días en auténticos pequenos historiadores.

Así foi parte do proceso de elaboración: 

BIBLIOTECA DO CEIP DE CURTIS

CURSO 2024/25

PROXECTO NÓS SOMOS HISTORIA: A BAIXA IDADE MEDIA

O alumnado de 3º de Primaria traballou este ano sobre a Baixa Idade Media, un período cheo de cambios sociais, retos e transformacións importantes.

A súa investigación centrouse en aspectos clave desta época: o xurdimento das cidades, a aparición dunha nova organización social, a chegada da peste negra e as revoltas irmandiñas que marcaron o final da Idade Media en Galicia. A través destas temáticas, o alumnado comprendeu mellor como vivían as persoas e como estes feitos influíron na nosa historia.

No día a día da aula elaboraron fichas de investigación, nas que recolleron datos, debuxos e reflexións. Ademais, participaron na creación do tapiz colectivo do proxecto e colaboraron nun vídeo en galego e en inglés, no que explicaron parte do aprendido. A experiencia completouse cunha emisión de radio escolar, que lles permitiu practicar a expresión oral e compartir cos demais o seu traballo.

Este proxecto axudoulles a desenvolver curiosidade histórica, habilidades de comunicación e, sobre todo, a comprender que estudar o pasado é unha forma de entender mellor o presente.

BIBLIOTECA DO CEIP DE CURTIS

CURSO 24/25

PROXECTO NÓS SOMOS HISTORIA: A ALTA IDADE MEDIA

Os alumnos e alumnas de 2º de Primaria mergulláronse este curso na Alta Idade Media, unha época chea de aventuras, descubrimentos e historias sorprendentes.

Durante o proxecto, investigaron diferentes aspectos desta etapa da historia: como os viquingos chegaban ás costas de Galicia, o papel dos mosteiros como centros culturais, a vida dos xograres, e o nacemento do Camiño de Santiago. Toda esta aprendizaxe quedou recollida nos seus cadernos, transformándose nun verdadeiro diario de exploración histórica.

Pero a historia non quedou só nas páxinas. Os nenos e nenas participaron na creación do tapiz colectivo, representando escenas e momentos destacados da época. Ademais, a través de lecturas e contos seleccionados pola titora, puideron imaxinar como se vivía na Idade Media: as casas, os oficios, a roupa e as tradicións da xente daquela época.

Para completar a experiencia, tamén aprenderon vocabulario en inglés relacionado co proxecto, combinando historia e lingua de maneira divertida e enriquecedora.

BIBLIOTECA DO CEIP DE CURTIS 

CURSO 2024/25

PROXECTO NÓS SOMOS HISTORIA: O NEOLÍTICO

 

Os alumnos de 6º de infantil traballaron sobre o Neolítico. Ao longo deste curso traballaron con teares, elaboraron os seus propios castros en miniatura e experimentaron coa cerámica ao estilo do Neolítico.

A continuación clica para ver o video no que comparten o resultado das súas investigacións e o proceso de elaboración do seu panel para o tapiz. 

Así foi o proceso para elaborar o tapiz ...

Obradoiro de cerámica ...

E visita á exposición no centro ao final de curso nas xornadas de portas abertas:  

BIBLIOTECA DO CEIP DE CURTIS

CURSO 2024/25

PROXECTO NÓS SOMOS HISTORIA: O SÉCULO XX

Panel para o tapiz "Nós somos historia" elaborado polos alumnos de 6º de primaria durante 

o curso 2024-2025

Ao longo do curso 2024-25 os alumnos de 6º de primaria traballaron sobre o século XX. Investigaron sobre a emigración galega, os indianos e a Guerra Civil a través da memoria dos avós. Estudaron o Estatuto de Autonomía e a creación das institucións galegas. Reflexionaron sobre a pandemia da COVID-19, a defensa do patrimonio natural (visitando a Praia das Catedrais) e a era dixital. Tamén traballaron sobre autores galegos como Neira Vilas, Castelao, Blanco Amor e Manuel Rivas. Todo este coñecemento foi recollido en soportes dixitais, vídeos e no tapiz colectivo do proxecto na exposición.

A continuación podedes ver os videos sobre o proxecto en galego e en inglés dispoñibles na nosa canle de youtube no que expoñen as investigacións levadas a cabo durante este curso.

Imaxes dos alumnos de 6º de primaria durante as "Xornadas de portas abertas" en xuño de 2025:

BIBLIOTECA DO CEIP DE CURTIS

CURSO 2024/25

PROXECTO NÓS SOMOS HISTORIA: O SÉCULO XIX

Panel para o tapiz "Nós somos historia" elaborado polos alumnos de 5º de primaria durante o curso 2024-2025.

Ao longo do curso 2024-2025 os alumnos de 5º de primaria traballaron sobre o século XIX. Investigaron sobre temas como a emigración e a arquitectura indiana. Culturalmente tivo lugar o Rexurdimento con Rosalía, Pondal e Curros. Tamén como a modernidade trouxo a Curtis o ferrocarril. Os alumnos de 5º tiveron a oportunidade de participar nun obradoiro con Paola Guimeráns especialista en e-téxtiles e traballaron co programa Scratch e coas Makey-Makey facendo o seu panel interactivo. 

A continuación podedes ver os videos no que recollen o resultado das súas investigacións en galego e en lingua inglesa recollidos na nosa canle de Youtube:

Tamén podedes ver algunhas imaxes co proceso de elaboración: 

Alumnos de 5º de primaria visitando a exposición nas "Xornadas de portas abertas" en xuño de 2025

BIBLIOTECA DO CEIP DE CURTIS 

CURSO 2024-2025

MAKING OF ... GALICIA IS US. MOMENTOS DIVERTIDOS.

Así foi o noso particular making of de Galicia is us.

 

OBRADOIRO DE TEATRO RADIOFÓNICO CON CRISTINA COLLAZO

O pasado 9 de xuño os alumnos de 4° e 5° de primaria tuvieron a oportunidade de participar nun obradoiro de teatro radiofónico da man de Cristina Collazo. Foi unha experiencia moi enriquecedora para o noso alumnado poder explorar as posibilidades do teatro no ámbito radiofónico da man de Cristina. 

Podes visitar a nosa conta de Instagram premendo na imaxe: 

VISITA DOS ALUMNOS DE INFANTIL A LABRECOS

 

II TORNEO DE RELEVOS