EMISÓN DE RADIO DE SEXTO DE PRIMARIA: CONTOS PARA SABOREAR

EMISIÓN DE 6º DE INFANTIL: CON MOITO CONTO

 

EMISIÓN DE RADIO DE 4º DE PRIMARIA

 

EMISIÓN DE 4º DE INFANTIL: PALABRAS MÁXICAS

OBRADOIRO "PINTANDO GALIZA" PARA 3º, 4º, 5º E 6º DE PRIMARIA NA SEMANA DAS LETRAS

Con motivo da celebración das Letras Galegas, o alumnado de 3º, 4º, 5º e 6º de Educación Primaria participou no obradoiro “Pintando Galicia”, unha actividade moi especial guiada pola artista de Curtis Elvira Sánchez.

Durante a xornada, as nenas e os nenos tiveron a oportunidade de achegarse ao mundo da arte da man dunha creadora da nosa contorna, coñecendo de primeira man o seu traballo, as súas técnicas e a súa visión artística. A través da pintura, o alumnado explorou diferentes elementos que identifican a nosa terra: as paisaxes, as tradicións, a cultura e a riqueza natural de Galicia.

O obradoiro converteuse nun espazo de creatividade e expresión no que cada participante puido plasmar a súa propia interpretación de Galicia, empregando as cores e as formas para transmitir emocións, lembranzas e sentimentos vinculados á nosa identidade.

Ademais de fomentar a creatividade, esta actividade permitiu valorar a importancia da arte como medio de comunicación e coñecer o talento dunha artista local, reforzando o vínculo entre a escola e a comunidade.

As creacións realizadas amosaron unha gran imaxinación e sensibilidade, enchendo as aulas de cor e convertendo a arte nunha fermosa maneira de celebrar a nosa cultura e a nosa lingua.

Queremos agradecerlle a Elvira Sánchez a súa colaboración, a súa proximidade co alumnado e a ilusión que transmitiu durante todo o obradoiro. Foi unha experiencia enriquecedora que, sen dúbida, deixará unha pegada especial nos nosos pequenos artistas.

FORMACIÓN EN RADIO CON DAMIÁN ALONSO

 

O pasado 8 de maio, o alumnado de 4º e 5º de Educación Primaria do CEIP de Curtis participou nun interesante obradoiro de radio impartido por Damián Alonso quen conta cunha ampla experiencia no ámbito da comunicación, da dobraxe e da radio educativa, colaborando ademais en proxectos relacionados coa radio escolar en Galicia.

Durante a sesión, o alumnado puido achegarse ao fascinante mundo da radio e descubrir como se prepara un programa: desde a elaboración do guión ata a gravación e o uso da voz diante do micrófono. A través de diferentes dinámicas prácticas, aprenderon a importancia da comunicación oral, da expresión, da entoación e do traballo en equipo.

A actividade resultou ser unha oportunidade para os nenos e nenas para perder o medo a falar en público, potenciar a creatividade e coñecer de preto o funcionamento dun medio de comunicación tan importante como a radio, experiencia conecta perfectamente co traballo que se desenvolve arredor da nosa biblioteca escolar e das actividades de expresión oral e escrita do centro.

Unha vez máis agradecer a visita e a implicación de Damián. 

NOVEMBRO, MES DA CIENCIA NO CEIP DE CURTIS

 

Durante o mes de novembro, a ciencia converteuse na gran protagonista das actividades do noso centro. Ao longo destas semanas, o alumnado participou en diferentes propostas que lle permitiron investigar, experimentar e aprender dun xeito práctico e divertido.

A robótica foi unha das actividades máis destacadas, permitindo aos nenos e nenas desenvolver o pensamento lóxico, a creatividade e a resolución de problemas mediante a programación e o manexo de diferentes dispositivos. A través dos retos propostos, o alumnado comprobou como a tecnoloxía pode axudarnos a comprender mellor o mundo que nos rodea.

A ciencia tamén chegou ás aulas a través da cociña. As receitas elaboradas polos distintos grupos convertéronse en auténticos experimentos nos que puidemos observar cambios de estado, mesturas, reaccións e transformacións dos alimentos, demostrando que a ciencia está presente nas actividades cotiás.

Outra das propostas máis vistosas foi a elaboración de maquetas do Sistema Solar. O alumnado investigou sobre os planetas, as súas características e a súa posición no universo, creando traballos cheos de detalle e imaxinación que permitiron achegarnos ao fascinante mundo da astronomía.

Con todas estas actividades, o CEIP de Curtis celebrou o Mes da Ciencia promovendo a curiosidade, a observación e o gusto por aprender. Porque a ciencia non só está nos laboratorios: está tamén nos robots, na cociña, nas estrelas e en cada pregunta que nos facemos sobre o mundo que nos rodea.

ROBÓTICA PARA EDUCACIÓN INFANTIL

A través do uso de robots adaptados á súa idade, o alumnado, mediante diferentes retos, tiveron que programar os robots para que se desprazasen por un taboleiro musical, identificando instrumentos traballados na aula.

Esta proposta permitiu combinar a expresión musical co desenvolvemento do pensamento lóxico e computacional, favorecendo ao mesmo tempo a colaboración, a resolución de problemas e a creatividade. Os pequenos e pequenas amosaron un grande entusiasmo durante toda a actividade, participando activamente e superando cada reto con ilusión.

A robótica educativa convértese así nunha ferramenta moi valiosa para enriquecer as experiencias de aprendizaxe, demostrando que a música e a tecnoloxía poden formar un excelente equipo.

PROXECTO NÓS SOMOS HISTORIA: A IDADE MODERNA

Os alumnos e alumnas de 4º de Primaria mergulláronse na Idade Moderna. A partir de diferentes fichas de traballo, foron investigando e afondando nos acontecementos históricos máis relevantes deste período, descubrindo tamén os importantes cambios sociais e económicos que transformaron a sociedade da época.

Durante a investigación, tiveron a oportunidade de coñecer mellor a figuras clave da nosa historia, entre elas María Pita, cuxo exemplo de valentía resultou especialmente inspirador para o alumnado.

O proxecto non se limitou só á parte teórica. Os nenos e nenas traballaron tamén na preparación do tapiz colectivo, no que representaron os feitos históricos máis destacados a través de cadros pintados sobre liño.

Para completar a experiencia, elaboraron unha presentación en galego e en inglés, na que explicaron o seu proceso de investigación e compartiron curiosidades sobre a Idade Moderna. Unha experiencia moi enriquecedora na que combinaron investigación, creatividade e comunicación, converténdose por uns días en auténticos pequenos historiadores.

Así foi parte do proceso de elaboración: 

BIBLIOTECA DO CEIP DE CURTIS

CURSO 2024/25

PROXECTO NÓS SOMOS HISTORIA: A ALTA IDADE MEDIA

Os alumnos e alumnas de 2º de Primaria mergulláronse este curso na Alta Idade Media, unha época chea de aventuras, descubrimentos e historias sorprendentes.

Durante o proxecto, investigaron diferentes aspectos desta etapa da historia: como os viquingos chegaban ás costas de Galicia, o papel dos mosteiros como centros culturais, a vida dos xograres, e o nacemento do Camiño de Santiago. Toda esta aprendizaxe quedou recollida nos seus cadernos, transformándose nun verdadeiro diario de exploración histórica.

Pero a historia non quedou só nas páxinas. Os nenos e nenas participaron na creación do tapiz colectivo, representando escenas e momentos destacados da época. Ademais, a través de lecturas e contos seleccionados pola titora, puideron imaxinar como se vivía na Idade Media: as casas, os oficios, a roupa e as tradicións da xente daquela época.

Para completar a experiencia, tamén aprenderon vocabulario en inglés relacionado co proxecto, combinando historia e lingua de maneira divertida e enriquecedora.

BIBLIOTECA DO CEIP DE CURTIS 

CURSO 2024/25

PROXECTO NÓS SOMOS HISTORIA: O SÉCULO XX

Panel para o tapiz "Nós somos historia" elaborado polos alumnos de 6º de primaria durante 

o curso 2024-2025

Ao longo do curso 2024-25 os alumnos de 6º de primaria traballaron sobre o século XX. Investigaron sobre a emigración galega, os indianos e a Guerra Civil a través da memoria dos avós. Estudaron o Estatuto de Autonomía e a creación das institucións galegas. Reflexionaron sobre a pandemia da COVID-19, a defensa do patrimonio natural (visitando a Praia das Catedrais) e a era dixital. Tamén traballaron sobre autores galegos como Neira Vilas, Castelao, Blanco Amor e Manuel Rivas. Todo este coñecemento foi recollido en soportes dixitais, vídeos e no tapiz colectivo do proxecto na exposición.

A continuación podedes ver os videos sobre o proxecto en galego e en inglés dispoñibles na nosa canle de youtube no que expoñen as investigacións levadas a cabo durante este curso.

Imaxes dos alumnos de 6º de primaria durante as "Xornadas de portas abertas" en xuño de 2025:

BIBLIOTECA DO CEIP DE CURTIS

CURSO 2024/25

PROXECTO NÓS SOMOS HISTORIA: O SÉCULO XIX

Panel para o tapiz "Nós somos historia" elaborado polos alumnos de 5º de primaria durante o curso 2024-2025.

Ao longo do curso 2024-2025 os alumnos de 5º de primaria traballaron sobre o século XIX. Investigaron sobre temas como a emigración e a arquitectura indiana. Culturalmente tivo lugar o Rexurdimento con Rosalía, Pondal e Curros. Tamén como a modernidade trouxo a Curtis o ferrocarril. Os alumnos de 5º tiveron a oportunidade de participar nun obradoiro con Paola Guimeráns especialista en e-téxtiles e traballaron co programa Scratch e coas Makey-Makey facendo o seu panel interactivo. 

A continuación podedes ver os videos no que recollen o resultado das súas investigacións en galego e en lingua inglesa recollidos na nosa canle de Youtube:

Tamén podedes ver algunhas imaxes co proceso de elaboración: 

Alumnos de 5º de primaria visitando a exposición nas "Xornadas de portas abertas" en xuño de 2025

BIBLIOTECA DO CEIP DE CURTIS 

CURSO 2024-2025

MAKING OF ... GALICIA IS US. MOMENTOS DIVERTIDOS.

Así foi o noso particular making of de Galicia is us.

 

NOS SOMOS HISTORIA: A ROMANIZACIÓN

Este curso, o alumnado de 1º de Primaria traballou sobre a Romanización, descubrindo como foi a chegada dos romanos a Galicia e a pegada que aínda permanece no noso territorio.

Ao longo do proxecto, investigaron quen eran os romanos, como vivían e por que chegaron ata aquí. Aprenderon sobre os campamentos romanos, as súas construcións e organización, e comprenderon como moitos dos seus inventos e costumes seguiron presentes durante séculos.

Un dos momentos máis especiais foi a visita ao Castro de Viladonga, onde puideron observar de preto restos arqueolóxicos e imaxinar como era a vida naquela época. Ademais, participaron nun obradoiro artístico, no que traballaron sobre algúns dos principais monumentos romanos e plasmaron, de forma creativa, o aprendido.

O proxecto completouse co traballo de vocabulario específico en inglés, o que lles permitiu explicar parte do que aprenderon noutra lingua, e coa preparación dun programa de radio escolar, no que compartiron as súas investigacións.

Grazas a esta experiencia, os nenos e nenas descubriron que a historia non é só algo do pasado: forma parte do lugar onde vivimos e segue acompañándonos no día a día.

Así foi o proceso: 

E a visita á exposición do proxecto nas xornadas de portas abertas: 

BIBLIOTECA DO CEIP DE CURTIS

CURSO 2024/25

NÓS SOMOS HISTORIA: A PREHISTORIA

Os alumnos e alumnas de 4º e 5º de Infantil traballaron ao longo do curso sobre o Paleolítico, unha das etapas máis antigas e fascinantes da prehistoria.

Ademais de participar na elaboración do tapiz colectivo, coñeceron como era a vida das persoas daquela época mediante lecturas, contos e materiais seleccionados pola súa titora. Grazas a estas propostas, os nenos e nenas puideron imaxinar como se organizaban as familias, de que maneira se alimentaban e como se protexían do frío e dos perigos.

Para completar o proxecto, realizaron diferentes obradoiros temáticos, nos que aprenderon dun modo divertido e manipulativo:

• “Pinturas do Paleolítico”, recreando as pinturas rupestres das cavernas.

• “Como vestían na prehistoria?”, explorando os materiais que utilizaban para facer roupa e abrigo.

• “Coñecemos os animais prehistóricos”, achegándose aos grandes animais que habitaban a Terra nesa época.

Estas actividades permitiron que o alumnado se convertera en auténticos pequenos exploradores do pasado, desenvolvendo a curiosidade, a creatividade e o gusto por aprender historia.

Obradoiro de pinturas rupestres: 

Obradoiro "Como vestían na prehistoria?"

    Obradoiro "Animais prehistóricos": 

Visita á exposición durante as xornadas de portas abertas: 

BIBLIOTECA DO CEIP DE CURTIS

CURSO 2024/25

HORARIO DA BIBLIOTECA PARA O CURSO 2024-2025

 

BENVIDOS AO NOVO CURSO 2024/25

 

Benvidos ao novo curso 2024/25 no que continuaremos co proxecto "Galcia somos nós". Ao longo deste curso os alumnos do Ceip de Curtis investigrarán sobre a Historia de Galicia e ao final de curso poderedes ver o resultado final UN GRAN TAPIZ que reflectirá os resultados da súa investigación. Comezamos!!!!

AULA CREATIVA

 

EMISIÓN DE RADIO RADIOLA DE 3º DE PRIMARIA

 

PROGRAMACIÓN PARA A SEMANA DO LIBRO (DO 23 AO 26 DE ABRIL)

Co eido do Día do libro durante esta semana están programadas na nosa biblio lecturas compartidas nas que os alumnos do cole compartirán lecturas.